Til Geirlaugar 16. ágúst sl.

Formið gott og falleg er,
fyllir hálfa öld.
Ellimerki engin sér
og fagnað skal í kvöld.

Kjartan og Geirlaug fimmtug

Bæði tvö í tugi fimm
til samans gera hundrað.
Aldrei verður ævin dimm
ekkert fær þeim sundrað.

Fyrrum vinnufélagi fertugur í dag

Í fjóra tugi hefur hann,
heldur betur lifað.
Um að ræða mætan mann
meira ei er skrifað.

Nokkrar föstudagsferskeytlur

Tíminn flýgur furðu hratt,
festir ekki rætur.
Það hef fyrir hreina satt
hann er ekki ætur.

Einskis vil ég óska mér,
óþarfi að vona.
Það veit sá er allt hér sér
svalt að hugsa svona.
(Ég er hörku kona!)

Sumarblíðan hún er hvar?
Heldur sig til baka.
Leitað hef ég hér og þar
hefur sólin vaka
-ð?

Andinn góður, lundin létt
ljúft að vera til.
Þetta þykir ekki frétt
þó segja hana vil.

Lýsi eftir logni´ og sól
leitt að vantar sumar.
Ef það kemur kátt um jól
kannski fæ mér humar.


Tugi telur hún í sex
tíguleg er frúin.
Með aldri nokkur virðing vex,
vinsæl barnatrúin.

Mig langar að segja sögur
syngja og lesa mikið.
Semja og bulla bögur
bæta mig fyrir vikið.

Það er gaman að sitja og sauma í
sjá myndirnar verða til.
Finn oftast fró og hvíld í því
að framkvæma mér í vil.
ASH 14.03.2011

Eftirfarandi staka varð til er ég var á leið í vinnu í fyrra fallinu mánudaginn 7. mars. Enginn var búinn að labba upp Eiríksgötuna rétt upp úr sjö:

Ég markaði spor í mjallhvíta fönn.
Magnað til baka að líta.
Hugurinn hélst þó við dagsins önn.
Held ei neitt muni' á mig bíta.

Afmælisvísur

Dagný hún er draumlynd mær
dugleg, oft hún bakar.
Hún var tuttuguogníu í gær
aldurinn ekki sakar.

Skemmtileg og skemmtir þér
skondin oft á köflum.
Ferðast vill og leika sér
og taka þátt í lífsins spennu-töflum.

Samið 28.02.2011 (sama dag og umrædd Dagný varð 30 ára)